Nel mes viniente de mayu, coinciendo cola cellebración de la Selmana de les Lletres Asturianes, va emitise per Teleasturias la versión n'asturianu del llargumetraxe McLintock fecha por Gonzali Producciones.
Habrá dos pases. El primeru, el vienres, 4 de mayu, a les 21:00 hores, y cuntará con un previu a mou de presentación de la película y el so doblaxe. El segundu, el domingu 6 de mayu, a les 15:30 hores, en redifusión.
Teleasturias sintonízase pel canal 66 de TDT nel centru de la comunidá autónoma o per internet na páxina de la emisora.
McLintock ye un filme de 1963 con una duración de 127 minutos. Ta protagonizáu por John Wayne, Maureen O'hara, Yvonne de Carlo, Patrick Wayne y Stefanie Powers nos papeles principales.
Gonzali Producciones versionó a la nuesa llingua esti títulu col repartu siguiente:
DOBLADORES: Antón Caamaño, Mayra Fernández, Fernando Marrot, Eladio Sánchez, Arantxa Fernández, Carlos Alba, Norberto Sánchez, Ana Díaz Morán, Carlos Novoa, Fernando de Luxán, Alberto Álvarez Peña, Rodrigo Alba, Armando Felgueroso, Inma Rodríguez, Carlos González, Ruth González, Marcos Nogueiro, Hugo García, I.G. González, Marisa López Diz, Jéssica de la Paz, Carlos Rodríguez. DIRECTOR DE DOBLAXE: Antón Caamaño. PRODUCTOR EXECUTIVU: Illán Gonzali.
ARGUMENTU:
George Washington McLintock (Jhon Wayne), ye un terrateniente d’Arizona con unos caducos principios basaos na rudez y el machismu, y que tarrez la llegada de colonos. Al empar, produzse la vuelta de la so muyer, Kate (Maureen O’Hara), que lu dexara por nun soportar les costumes del oeste y agora torna col enfotu de llevar a la so fía a un sitiu más civilizáu. A partir d’esi momentu, van asocedese les engarradielles ente dambos, lo que va provocar situaciones cómiques, agravaes pola contratación d’una nueva y guapa cocinera na facienda (Ivonne de Carlo).
No hay comentarios:
Publicar un comentario en la entrada